نسينا

 

النهارده الصبح, و أنا قايم للكلية شفت رسالة مبعوتة من أحب الناس ليا .. محمد شعت بعت في جروبنا يبلغنا ان أحد أصدقاءنا المقيمين اللي في غزة استشهد من أربع أيام..

بعد تمثيلية وقف اطلاق النار بتاعت اليهود اللي ميتصدقلهمش كلمة, و لسبب مقدرش أتحجج بيه.. فصلت تماما عن النت. أخر خبر كنت سمعته عن غزة كان ان الخونة غدروا بينا .. لسة قريب كنت رجعت و فتحت عينيا تاني

  لأكتشف ان الوضع أسوأ من الأول و المصيبة كانت ان أنا اتعودت المشهد

واحد تلو الأخر, الصحفيين اللي كنت بتابعهم يستشهدوا , و أنا قاعد ساكت.. كمية غير مسبوقة لأطفال بدون رؤوس و أنا قاعد ساكت..

شوية شوية بقيت انسى أدعي لهم  بعد ما انشغلت بدنيتي.. و الأيام عدت

و أدينا هنا.. انك تخسر واحد تحبه في الله مش حاجة بتحصل للأخرين فقط.. لما يحصل هتعمل ايه؟ 

لما ربنا يسألنا عملنا في حقهم ايه هنقول ايه؟ هل فعلا سدينا ثغرنا ولا عملنا زي الناس اللي رجعت لماكدونالدز لما تم اعلان وقف اطلاق النار؟

الله يرحمك يا هادي و يجمعك بالصالحين يا رب..

متنسوش غزة يا جماعة.. متنسوش بجد.. انشر عن أخبارهم كل يوم و نكد على نفسك. تألم ولو كان ثانية و فكر غيرك عشان على الأقل ان مكنتش هتنفعهم, على الأقل متبقاش هامش زي كل هامش ثاني معملش حاجة.. ربنا شايف