دين المحتل

 مش من طبيعتي اني أكتب بالعربي. ده لأني ممارستش الكتابة بالعربي من فترة طوييييلة جدا. الموضوع صراحة مكانش عامل لي أزمة أوي. الناس اللي حواليا بيتكلموا انجليزي و اللي مبيتكلموش، بنكي اللغوي كان كفاية انه يمشي أموري معاهم. 

صحيح انه بالنسبة لي، لغتي الأم بتجيلي بتلقائية أكثر و بعرف بيها أعبر عن نفسي أكثر. بس اللغة الثانية كانت زي أداة الشياكة. بمعنى ان استعمالها كان مبهر للي شافه. 

غير كده كانت اللغة الثانية بتتيح ليا اني أبوح بحاجات أو أقول حاجات مستحيل أقولها بلغتي الأم بسبب تحفظي الشديد من اني أستعمل كلمات قبيحة في لغة أنا بعظمها و بحبها..

بس مؤخرا لاحظت حاجة.. الموضوع بدأ بسؤال بسيط.

"يعني ايه تكون مصري؟" الموضوع يبان سهل بس أنا لما قعدت أفكر من غير بحث. ملقتش إجابة. الحضارة بتتكون بسبب دين و عادات و تقاليد. طيب لو شلنا الدين من عادات مصر. يتبقى ايه؟ إزاي تعرف ان حد مصري من غير ما ينطق أو انك تشوفوا بياكل كشري ؟

لو على هدوم. فهدومنا و لبسنا تقليد غربي صرف. لو تكلمنا على كلام

فأول كلمة تيجي في بالي من كثر ما سمعتها هي "يسطا". طب يا سيدي منظر. شكلنا ايه. أنا مقدرش أصورهالك بس أنا كمصري أقدر أعرف واحد مصري زيي بالحس.. انما كمنظر، هل مثلا الحلقة الغريبة بتاعت السرسجية هي اللي تعتبر علامة للشباب المصري دلوقتي ؟ و لا لفة الطرحة الصغيرة بتاعت البنات اللي مبينة الرقبة.. هل دي تعبر عن شخصية الشابة المصرية دلوقتي ؟

فيه فلمين شفتهم مؤخراً لفوا معايا جامد أوي. 

أولهم فيلم اسمهCourageous.. الفيلم بيتكلم عن أهمية الأبوة. و ازاي ان الأب عليه مسؤولية كبيرة فتربية ولاده و انه يكون صاحبهم و راعي عليهم و ازاي ان هو أساس حبهم لدينهم و اتباعه. الفيلم اللي كاتبه قسيس مسيحي و حبكته درامية. الفيلم ذات نفسه كقصة بسيط و رائع بس شدني التركيز في فكرة الأب اللي بيزرع القيم في ولاده دي.

ثاني فيلم شفته كان فيلم Wake Up Dead Man: A Knives Out Mystery.. ده بقى فيلم من أفلام الغموض بتاعت البحث عن القاتل. الفيلم محوره حوالين قسيس صغير في السن تم اتهامه ظلم بمقتل قسيس كبير. القسيس الكبير ده راجل نصاب بيحرض على الكراهية و الخوف و بيمشي عكس واقع الدين المسيحي (على كلام القسيس الشاب الصغير الطيب اللي احنا من أول الفيلم متابعين قصته و بنحبه بسبب تصرفاته اللي تثبت انه شخص كويس)... 

طيب ايه المشترك ما بين الفلمين دول؟ غير انهم بيدوروا بشكل أو بأخر حول محور الدين و ان هما بيحترموا دين المسيحية حتى و ان كانت احدى شخصيات الفيلم ملحدة. 

صراحة... مفيش اشتراك غير دول. بس اللي شدني أوي هو فكرة التربية دي. مؤخرا لما كنت بفتح مواقع التواصل الاجتماعي كنت ألاقي ناس عمالة تتخانق. رجالة بتقول كلام يخزي عن الستات و ستات تحسهم عندهم جرأة يتكلموا عن الرجالة بقلة أدب غريبة. الطرفين بيولعوا في بعض. و الأسوأ ان حد ييجي في النص يكون في صف الطرف الأولاني بس بيبرر للطرف الثاني. كان استوقفني فيديو لشاب و هو بيبرر لأن بعض الشباب مش عايزين مراتاتهم ينزلوا يشتغلوا بيقول ان هما عايزين يحسوا ان هما متحكمين عشان هما حاسسين ان رجولتهم ناقصة ... Emasculated على كلامه. 

ممكن تلاقي نفسك مسحوب وسط الدوشة و وجع القلب و الانفصال عن الواقع ده. لحد ما تلاحظ ان الواقع اللي احنا عايشينه مش بيتغير. ده على العكس بينتقل للأسوأ. و لحااااد ما نموت هيفضلوا الأطراف دي بيغلطوا و يشتموا في بعض بعيدا عن الحياة الحقيقية. سواء بقى انت اقتنعت مع أحد الطرفين و لا لأ...

طيب احنا وصلنا لهنا ازاي ؟ فاكر أهمية دور الأب و الأم في زرع القيم و الدين؟ تفتكر لو أبوك و أمك مسحولين في الشغل طول الوقت ، هيربوك امتى. هيعرفوا تفاصيل التفاصيل بتاعت ولادهم امتى؟ ده لو هما مكانوش متطلقين أصلا. طيب انت متربتش يا سيدي على الدين و لا القيم. بس انت طبيعتك انك فيه فراغ روحاني انت عايز تملاه. عايز يبقى ليك هدف في الحياة. مين هيربيك. مين يملى الفراغ؟ 

النت. فانت تملى قلبك بقشور الدين أو بقشور تفكير فلسفي أو حركة سياسية سواء redpill الذكورية أو الfemenism. و تقعد انت بمعتقداتك الجديدة تلاقي انتماء و ناس عندها هدف و قيم بتتزرع و مبادئ بتتحط. 

و شكراً. خلصت القصة.  مرحبا بك في دين المحتل. انت عايز تقلد المحتل و بتفتخر بقدرتك على تقليده. هويتك الأصلية ديكور أو أداة تتعرف بيها على الناس اللي زيك و بس. 

الأسوأ في كل ده هو انه على عكس الأمريكان و المسيحيين في تصويرهم لنفسهم و دينهم. احنا سامحين للمهاطيل اللي عندنا ان هما يعملوا أفلام سيئة يا اما بيسخروا فيها من ديننا و قيمنا يا اما بتحرض عليها و بتشوهها يا اما بتكون أفلام خالية من الفكر. زي كام فيلم نازلين مؤخرا ممكن اختصارهم فان هما زنا. بس كده.

واقعياً الأفلام العربية مبتخادش مساحتها في انها تبقى ممتعة و فيها فن و كذلك تكون مشجعة على قيم المجتمع... أو يمكن فيه و أنا مخدتش بالي.. ما هو في الأخر ثلاث أرباع اعلانات الأفلام اللي بتطلعلي أفلام أجنبية. و اللي بشوفه من حضارة و تقاليد مصر منقسمة لشقين يا شق "السرسجية" و هو شق يمكن اختصاره لأغاني شعبية مزعجة و تسريحة شكلها وحش.. أو الشق الثاني و هو Egypt و دول ناس بيتكلموا مصري بس بيحاولوا يكونوا من California .. بيبقى حاجة ممسوخة غريبة كده. 

طب هل فيه شقوق ثانية.. آه عادي، بس اللي بيظهر لي هو النجاسة دي.. عشان كده مبتابعش المحتوى المصري أصلا.

طيب .. و بعدين ؟ ايه الحل ؟ 

لو انت أب أو أم. ربي عيالك. حببهم في الدين. عشان في مخ العيل ، هو مش هيعرف يسمع كلام حد متعودش انه يحبه أو ميعرفوش. ابنك ليه يصلي لو هو ميعرفش مين ربنا ؟ مهو ميعرفوش فبالتالي مستحيل يحبه. 

لو انت شاب.. روح مكان كويس و اتعرف على دينك. املى فراغك الروحي و هويتك بحاجة تنفعك و تنفع مجتمعك. حاجة تخليك تبني في المجتمع. مش تمشي تتخانق مع اللي فيه بقشور الدين اللي انت متمسك بيها و ممكن تكون فاهمها غلط بسبب هبل التيكتوك. 

اتعلم إزاي تأمر بالمعروف و تنهى عن المنكر صح. ابدأ صلح في نفسك الأول و بالراحة الدنيا حواليك هتتغير بسبب تصرفاتك و تعاملاتك. اتعامل صح غيرك يطيب و يحن. أنصر الحق و الباطل يكش. اتحرك. اعمل حاجة.

انما خناق النت على الحق و الباطل مع حد فاكر نفسه أفهم من علماء كرسوا حياتهم لعلوم الدين و هو لسة بشخة ميعرفش أصلا يعني ايه بطة بالعربي (أيوة بطة بالعربي) ملوش لزمة. يتحرق النت باللي فيه، المهم أرض الواقع.